top


ਚੰਡੀਗੜ੍ਹ

25
Jun
USA : ਨਾਬਾਲਗ ਕੁੜੀਆਂ ਨੂੰ ਵਰਗਲਾਉਣ ਦੇ ਦੋਸ਼ 'ਚ 4 ਪੰਜਾਬੀਆਂ ਸਣੇ 19 ਗ੍ਰਿਫ਼ਤਾਰ
ਨਿਊਯਾਰਕ : ਬੀਤੇ ਦਿਨ ਕੈਲੀਫੋਰਨੀਆ ਸੂਬੇ ਦੇ ਸ਼ਹਿਰ ਲੈਥਰੋਪ ਵਿਚ ਸਥਾਨਕ ਪੁਲਸ ਵੱਲੋਂ ਇਕ ਸਟਿੰਗ ਆਪ੍ਰੇਸ਼ਨ ਕਰਕੇ ਨਾਬਾਲਗ ਕੁੜੀਆਂ ਨੂੰ ਵਰਗਲਾਉਣ ਦੀ ਕੋਸ਼ਿਸ਼ ਕਰਦੇ 19 ਲੋਕਾਂ ਨੂੰ ਰੰਗੇ ਹੱਥੀਂ ਹਿਰਾਸਤ ਵਿਚ ਲਿਆ ਗਿਆ। ਜਾਣਕਾਰੀ ਮੁਤਾਬਕ ਹਿਰਾਸਤ ਵਿਚ ਲਏ ਲੋਕਾਂ ਵਿਚੋਂ 4 ਪੰਜਾਬੀ ਵੀ ਹਨ, ਜਿਨ੍ਹਾਂ ਦੀ ਪਛਾਣ 46 ਸਾਲਾ ਸਰਬਜੀਤ ਸਿੰਘ ਸ਼ੇਰਗਿੱਲ, 35 ਸਾਲਾ ਸਿਮਰਨ ਸਿੰਘ, 35 ਸਾਲਾ ਸ਼ੇਰ ਸਿੰਘ ਰੰਧਾਵਾ ਤੇ 39 ਸਾਲਾ ਵਿਸ਼ਾਲ ਸਿੰਘ ਵਜੋਂ ਹੋਈ ਹੈ। ਇਸ ਤੋਂ ਇਲਾਵਾ ਇਕ ਫਿਜ਼ੀ ਮੂਲ ਦਾ 40 ਸਾਲਾ ਰੋਨੀਲ ਸਿੰਘ ਨਾਂ ਦਾ ਵਿਅਕਤੀ ਵੀ ਸ਼ਾਮਲ ਹੈ। ਹੋਰਨਾਂ ਗ੍ਰਿਫ਼ਤਾਰ ਲੋਕਾਂ ‘ਚ ਡੈਰਲਨ ਪੇਟਰਸਨ, ਹੁਆਨ ਗਾਰਸੀਆ, ਹਰਮੈਨ ਗਲੀਡੋ, ਰਾਬਰਟ ਪੀਨਾ, ਡੈਨੀਅਲ ਸਨੋਅ, ਰਾਇਨ ਵਿਗਲੇ, ਗੋਲਡਨ ਬਰਿਆਨ, ਜੋਸਫ ਕੈਸੀਓ, ਹਾਊਥ ਆਵਰ, ਮਾਰੀਓ ਮਾਰਟਨੀਜ਼, ਰੋਨਾਲਡ ਕੀਜ਼, ਮਾਰਕ ਪਰੋਵੈਂਕਲੋ, ਲੂਈਸ ਗੁਜ਼ਮੈਨ ਅਤੇ ਕ੍ਰਿਸਟੀਨੋ ਰੋਡਰੇਜ਼ ਸ਼ਾਮਲ ਹਨ। ਮੀਡੀਆ ਮੁਤਾਬਕ ਗ੍ਰਿਫ਼ਤਾਰ ਹੋਏ ਲੋਕਾਂ ਵਿਚੋਂ ਕੋਈ ਵੀ ਵਿਅਕਤੀ ਲੈਥਰੋਪ ਦਾ ਨਹੀਂ ਸੀ ਅਤੇ ਸਾਰੇ ਹੀ ਬਾਹਰੋਂ ਆਏ ਸਨ। ਪੁਲਸ ਮੁਖੀ ਮੁਤਾਬਕ ਲੈਥਰੋਪ ਪੁਲਸ ਵਿਭਾਗ ਵੱਲੋਂ ਹੁਣ ਤੱਕ ਦਾ ਇਹ ਸਭ ਤੋਂ ਵੱਡਾ ਆਪ੍ਰੇਸ਼ਨ ਸੀ, ਜਿਸ ਦੌਰਾਨ 19 ਵਿਅਕਤੀ ਇਕੱਠੇ ਫੜੇ ਗਏ। ਪੁਲਸ ਮੁਖੀ ਨੇ ਦੱਸਿਆ ਕਿ ਇਹ ਲੋਕ ਘੱਟ ਉਮਰ ਦੀਆਂ ਲੜਕੀਆਂ ਨੂੰ ਆਨਲਾਇਨ ਡੇਟਿੰਗ ਕਰਕੇ ਮਿਲਣ ਦਾ ਥਾਂ ਨਿਸ਼ਚਿਤ ਕਰਦੇ ਸਨ ਪਰ ਇਸ ਵਾਰ ਇਹ ਆਪ੍ਰੇਸ਼ਨ ਪੁਲਸ ਵੱਲੋਂ ਕੀਤਾ ਗਿਆ। ਦੋ ਹਫਤੇ ਚੱਲੇ ਇਸ ਆਪ੍ਰੇਸ਼ਨ ਵਿਚ ਇਹ ਲੋਕ ਹਿਰਾਸਤ ਵਿਚ ਲਏ ਗਏ ਹਨ। ਪੁਲਸ ਮੁਖੀ ਨੇ ਦੱਸਿਆ ਕਿ ਮਾਂ-ਬਾਪ ਨੂੰ ਆਪਣੇ ਬੱਚਿਆਂ ‘ਤੇ ਸਖ਼ਤ ਨਜ਼ਰ ਰੱਖਣ ਦੀ ਲੋੜ ਹੈ, ਤਾਂ ਕਿ ਅਜਿਹੇ ਲੋਕਾਂ ਤੋਂ ਉਨ੍ਹਾਂ ਦੀ ਇੱਜ਼ਤ ਨੂੰ ਬਚਾਇਆ ਜਾ ਸਕੇ।
25
Jun
ਸਿੱਖ ਸਿਪਾਹੀਆਂ ਨੇ ਚੀਨ ਦੀ ਸਰਹੱਦ ਤੇ ਦੁਹਰਾਇਆ ਅਠਾਰਵੀ ਸਦੀ ਦੇ ਬਾਬਾ ਬੋਤਾ ਸਿੰਘ ਤੇ ਗਰਜਾ ਸਿੰਘ ਦਾ ਇਤਿਹਾਸ
ਸ਼ੋਸ਼ਲ ਮੀਡੀਏ ਤੇ ਭਾਰਤ ਚੀਨ ਸਰਹੱਦ ਦੇ ਪੂਰਵੀ ਲਦਾਖ ਖੇਤਰ ਚ ਭਾਰਤੀ ਅਤੇ ਚੀਨੀ ਫੋਜ ਦਰਮਿਆਨ ਹੋਏ ਮੁੱਠਭੇੜ ਤੋਂ ਬਾਅਦ ਵਾਪਰੀ ਇੱਕ ਅਜਿਹੀ ਘਟਨਾ ਦੀ ਖਬਰ ਸੁਣੀ ਹੈ,ਜਿਸ ਨੇ ਅਠਾਰਵੀਂ ਸਦੀ ਦੇ ਸਿੱਖ ਸੂਰਬੀਰਾਂ ਦੀ ਯਾਦ ਨੂੰ ਤਾਜਾ ਕਰ ਦਿੱਤਾ ਹੈ,ਇਸ ਲਈ ਇੱਥੇ ਸਿੱਖਾਂ ਦੇ ਪਿਛੋਕੜ ਤੇ ਵੀ ਸਰਸਰੀ ਝਾਤ ਮਾਰਨੀ ਜਰੂਰੀ ਬਣਦੀ ਹੈ।ਅਠਾਰਵੀਂ ਸਦੀ ਚ ਸਿੱਖਾਂ ਨੇ ਜੋ ਕਾਰਨਾਮੇ ਕੀਤੇ,ਉਹ ਅਪਣੇ ਗੁਰੂ ਦੇ ਹੁਕਮ ਚ ਰਹਿੰਦਿਆਂ ਤੇ ਗੁਰੂ ਨੂੰ ਹਾਜਰ ਨਾਜਰ ਜਾਣਦਿਆਂ ਗੁਰੂ ਤੇ ਪੂਰਨ ਭਰੋਸ਼ੇ ਨਾਲ ਕੀਤੇ,ਜਿਸ ਵਿੱਚ ਸਿੱਖ ਸਫਲ ਵੀ ਹੁੰਦੇ ਰਹੇ ਹਨ।ਅਫਗਾਨੀ ਧਾੜਵੀਆਂ ਤੋ ਲੁੱਟ ਦੇ ਮਾਲ ਚ ਭਾਰਤੀ ਬਹੂ ਬੇਟੀਆਂ,ਜਿੰਨਾਂ ਨੂੰ ਅਵਦਾਲੀ,ਦੁਰਾਨੀ ਗਜਨੀ ਦੇ ਬਜਾਰਾਂ ਵਿੱਚ ਟਕੇ ਟਕੇ ਨੂੰ ਵੇਚਣ ਲਈ ਲੈ ਕੇ ਜਾਂਦੇ ਸਨ,ਉਹਨਾਂ ਬੀਬੀਆਂ ਨੂੰ ਗੁਰੂ ਦੇ ਸਿੱਖ ਰਸਤੇ ਵਿੱਚ ਹੀ ਅਫਗਾਨੀ ਧਾੜਵੀਆਂ ਤੇ ਹਮਲੇ ਕਰਕੇ ਸਮੇਤ ਲੁੱਟ ਦੇ ਸਮਾਨ ਦੇ ਛੁਡਵਾ ਲੈਂਦੇ ਤੇ ਬਹੂ ਬੇਟੀਆਂ ਨੂੰ ਉਹਨਾਂ ਦੇ ਘਰਾਂ ਤੱਕ ਸੁਰਖਿਅਤ ਛੱਡ ਕੇ ਆਉਂਣ ਦੀ ਜੁੰਮੇਵਾਰੀ ਵੀ ਗੁਰੂ ਦਾ ਖਾਲਸਾ ਨਿਭਾਉਂਦਾ ਰਿਹਾ।ਕੋਈ ਸਮਾ ਆਇਆ ਜਦੋ ਦੁਸ਼ਮਣ ਹਾਕਮਾਂ ਨੇ ਸਾਰੀ ਕੌਂਮ ਖਤਮ ਕਰਨ ਦਾ ਭਰਮ ਪਾਲ ਕੇ ਇਹ ਐਲਾਨ ਕਰ ਦਿੱਤਾ ਕਿ ਸਿੱਖ ਖਤਮ ਕਰ ਦਿੱਤੇ ਗਏ ਹਨ,ਤਾਂ ਉਸ ਮੌਕੇ ਦੋ ਗੁਰੂ ਦੇ ਸਿੱਖਾਂ ਨੇ ਧਾੜਵੀਆਂ ਦੇ ਰਸਤੇ ਤੇ ਨਾਕਾ ਲਾ ਕੇ ਖਾਲਸਾ ਰਾਜ ਦਾ ਐਲਾਨ ਕਰ ਦਿੱਤਾ ਤੇ ਉਸ ਰਸਤੇ ਤੋਂ ਲੰਘਣ ਵਾਲਿਆਂ ਤੋ ਜਜ਼ੀਆ ਵਸੂਲਣਾ ਸੁਰੂ ਕਰ ਦਿੱਤਾ। ਇੱਥੇ ਇਹ ਵੀ ਦੱਸਣਾ ਜਰੂਰੀ ਹੈ ਕਿ ਸਿੰਘਾਂ ਵੱਲੋਂ ਜਜ਼ੀਆ ਵਸੂਲਣ ਦਾ ਮਤਲਬ ਲੋਕਾਂ ਤੋਂ ਧੱਕੇਸ਼ਾਹੀ ਨਾਲ ਉਗਰਾਹੀ ਕਰਨਾ ਨਹੀ ਸੀ, ਬਲਕਿ ਉਸ ਮੌਕੇ ਦੇ ਜਾਬਰ ਹਾਕਮਾਂ ਨੂੰ ਇਹ ਸਪੱਸਟ ਸੁਨੇਹਾ ਦੇਣਾ ਸੀ,ਕਿ ਜਿਸ ਕੌਂਮ ਨੂੰ ਤੁਸੀ ਖਤਮ ਕਰਨ ਦਾ ਭਰਮ ਪਾਲ ਰਹੇ ਹੋ,ਉਹ ਤਾਂ ਅਪਣੇ ਸੀਨੇ ਚ ਇਸ ਜਾਬਰ ਰਾਜ ਦਾ ਖਾਤਮਾ ਕਰਕੇ ਧਰਮ ਦਾ ਰਾਜ ਕਾਇਮ ਕਰਨ ਦਾ ਸੁਪਨਾ ਸੰਜੋਈ ਬੈਠੇ ਹਨ।ਉਹਨਾਂ ਨੇ ਇਹ ਵੀ ਸੁਨੇਹਾ ਦਿੱਤਾ ਕਿ ਇਹ ਪਰਮਾਤਮ ਕੀ ਮੌਜ ਚੋਂ ਪੈਦਾ ਹੋਈ ਕੌਂਮ ਨੂੰ ਖਤਮ ਕਰਨ ਵਾਲਾ ਦੁਨੀਆ ਤੇ ਕੋਈ ਪੈਦਾ ਨਹੀ ਹੋਇਆ।ਉਹ ਗੁਰੂ ਦੇ ਸਿੱਖ ਸਨ ਬਾਬਾ ਬੋਤਾ ਸਿੰਘ ਤੇ ਬਾਬਾ ਗਰਜਾ ਸਿੰਘ,ਜਿਹੜੇ ਮਹਿਜ ਜਜ਼ੀਆ ਉਗਰਾਹ ਕੇ ਉੱਥੋ ਭੱਜੇ ਨਹੀ ਬਲਕਿ ਉਹਨਾਂ ਨੇ ਦੁਸ਼ਮਣ ਦੀ ਓਨੀ ਦੇਰ ਉਡੀਕ ਕੀਤੀ ਜਿੰਨੀ ਦੇਰ ਦੁਸ਼ਮਣ ਦੀਆਂ ਫੌਜਾਂ ਉਹਨਾਂ ਦੋ ਗੁਰੂ ਕੇ ਸਿੱਖਾਂ ਨਾਲ ਯੁੱਧ ਕਰਨ ਆ ਨਹੀ ਗਈਆਂ।ਇੱਥੇ ਇਹ ਵੀ ਦੱਸਣਾ ਜਰੂਰੀ ਹੈ ਕਿ ਬਾਬਾ ਬੋਤਾ ਸਿੰਘ ਤੇ ਬਾਬਾ ਗਰਜਾ ਸਿੰਘ ਨੇ ਕਿਸੇ ਰਵਾਇਤੀ ਹਥਿਆਰਾਂ ਨਾਲ ਦੁਸ਼ਮਣ ਦਾ ਟਾਕਰਾ ਨਹੀ ਸੀ ਕੀਤਾ,ਬਲਕਿ ਸੋਟਿਆਂ ਨਾਲ ਹਿੱਕ ਡਾਹ ਕੇ ਆਖਰੀ ਸਾਹ ਤੱਕ ਲੜ ਕੇ ਸ਼ਹੀਦੀਆਂ ਪਾਈਆਂ ਸਨ।ਇੱਥੇ ਇਹ ਪਰਸੰਗ ਦੱਸਣਾ ਤਾਂ ਜਰੂਰੀ ਹੈ ਕਿਉਂਕਿ ਕੁੱਝ ਦਿਨ ਪਹਿਲਾਂ ਭਾਰਤੀ ਫੌਜ ਦੀ ਚੀਨੀ ਫੌਜਾਂ ਨਾਲ ਹੋਈ ਮੁੱਠਭੇੜ ਦੌਰਾਨ ਵੀ ਸਿੱਖ ਫੌਜੀਆਂ ਵੱਲੋਂ ਅਪਣੇ ਉਹਨਾਂ ਪੁਰਖਿਆਂ ਦਾ ਇਤਿਹਾਸ ਦੁਹਰਾਇਆ ਗਿਆ ਹੈ,ਜਿਸ ਵਿੱਚ ਭਾਰਤ ਦੇ ਵੀਹ ਸਿਪਾਹੀ ਮਾਰੇ ਗਏ ਸਨ ਤੇ 10 12 ਨੂੰ ਚੀਨੀਆਂ ਵੱਲੋਂ ਅਗਵਾ ਕਰ ਲਿਆ ਗਿਆ ਸੀ,ਉਸ ਮੌਕੇ ਜੋ ਕਾਰਨਾਮੇ ਸਿੱਖ ਫੌਜੀਆਂ ਨੇ ਕਰਕੇ ਅਪਣੇ ਗੁਰੂ ਦੇ ਬਚਨਾਂ ਨੂੰ ਸੱਚ ਕਰਕੇ ਦਿਖਾਇਆ ਹੈ,ਉਹਦੇ ਤੇ ਭਾਂਵੇਂ ਦੇਸ਼ ਦੇ ਹਰ ਇਨਸਾਫ ਪਸੰਦ ਸਹਿਰੀ ਨੂੰ ਮਾਣ ਹੋਣਾ ਚਾਹੀਦਾ ਹੈ,ਪਰ ਇਸ ਘਟਨਾ ਕਾਰਨ ਦੇਸ਼ ਦੇ ਫਿਰਕੂ ਹਾਕਮਾਂ ਦੀ ਅਕਿਰਤਘਣਤਾ ਵੀ ਜੱਗ ਜਾਹਰ ਹੋ ਗਈ ਹੈ,ਜਿਹੜੇ ਸਿੱਖ ਜੁਆਨਾਂ ਦੀ ਇਸ ਬੇਮਿਸ਼ਾਲ ਬਹਾਦਰੀ ਨੂੰ ਛੁਪਾਈ ਬੈਠੇ ਹਨ। ਇਸ ਨਿਆਰੀ ਨਿਰਾਲੀ ਕੌਂਮ ਨੂੰ ਖਤਮ ਕਰਨ ਦਾ ਭਰਮ ਪਾਲੀ ਬੈਠੇ ਹਾਕਮਾਂ ਨੂੰ ਇਹ ਸਮਝ ਲੈਣਾ ਚਾਹੀਦਾ ਹੈ ਕਿ ਜਿਹੜੀ ਕੌਂਮ ਦੁਨੀਆਂ ਦੀਆਂ ਅਜੇਤੂ ਤਾਕਤਾਂ ਨੂੰ ਹਰਾਉਣ ਦਾ ਦਮ ਰੱਖਦੀ ਹੈ ਤੇ ਜਿਹੜੀ ਕੌਂਮ ਦੇ ਜਾਏ ਚੀਨ ਵਰਗੀਆਂ ਵੱਡੀਆਂ ਤਾਕਤਾਂ ਨੂੰ ਟਿੱਚ ਸਮਝਦੇ ਹਨ,ਉਹਨਾਂ ਨਾਲ ਕਮੀਨਗੀ ਸੋਭਾ ਨਹੀ ਦਿੰਦੀ,ਬਲਕਿ ਅਜਿਹਾ ਵਰਤਾਰਾ ਦੇਸ਼ ਦੇ ਨੁਕਸਾਨ ਵਿੱਚ ਜਾ ਸਕਦਾ ਹੈ। ਟੀਵੀ ਚੈਨਲ ਏ ਵੀ ਪੀ ਸਾਂਝਾ ਤੇ ਇੱਕ ਖਬਰ ਦਿਖਾਈ ਗਈ ਹੈ,ਜਿਸ ਵਿੱਚ ਦੱਸਿਆ ਗਿਆ ਹੈ ਕਿ ਇਹ ਘਟਨਾ 15 ਜੂਨ ਨੂੰ ਭਾਰਤ ਚੀਨ ਸਰਹੱਦ ਦੇ ਪੂਰਬੀ ਲਦਾਖ ਖੇਤਰ ਦੀ ਜਲਬਾਨ ਘਾਟੀ ਤੇ ਹੋਏ ਭਾਰਤੀ ਚੀਨੀ ਮੁੱਠਭੇੜ ਨਾਲ ਜੁੜੀ ਹੋਈ ਹੈ,ਜਿਸ ਵਿੱਚ 20 ਜੁਆਨਾਂ ਸਮੇਤ ਬਿਹਾਰ ਰਜਿਮੈਂਟ ਦਾ ਇੱਕ ਅਫਸਰ ਸੰਤੋਸ਼ ਬਾਵੂ ਸ਼ਹੀਦ ਹੋ ਗਏ ਸਨ।ਖਬਰ ਵਿੱਚ ਦੱਸਿਆ ਗਿਆ ਹੈ ਕਿ 16 ਜੂਨ ਨੂੰ ਬਿਹਾਰ ਰਜਿਮੈਂਟ ਨੇ ਅਪਣੇ ਅਫਸਰ ਦੀ ਮੌਤ ਦਾ ਬਦਲਾ ਲੈਣ ਲਈ ਚੀਨੀ ਕੈਂਪ ਤੇ ਹਮਲਾ ਕੀਤਾ,ਜਿਸ ਵਿੱਚ ਉਹਨਾਂ ਦੇ ਨਾਲ ਸਿੱਖ ਰਜਿਮੈਟਾਂ ਦੇ ਜਵਾਨ ਵੀ ਸ਼ਾਮਿਲ ਸਨ,ਪ੍ਰੰਤੂ ਜੋ ਕਾਰਨਾਮਾ ਸਿੱਖ ਫੌਜੀਆਂ ਦੇ ਹਿੱਸੇ ਆਇਆ ਉਹ ਕਿਸੇ ਹੋਰ ਦੇ ਹਿੱਸੇ ਨਹੀ ਆ ਸਕਿਆ।ਸਿੱਖ ਜਵਾਨਾਂ ਨੇ ਚੀਨੀ ਕੈਂਪ ਤੇ ਡਾਂਗਾਂ ਸੋਟੀਆਂ ਨਾਲ ਹਮਲਾ ਕਰਕੇ ਉਥੋਂ ਉਹਨਾਂ ਦਾ ਇੱਕ ਫੌਜੀ ਅਫਸਰ ਵੀ ਅਗਵਾ ਕਰ ਲਿਆਂਦਾ,ਜਿਸ ਕਰਕੇ ਬਾਅਦ ਵਿੱਚ ਹੋਈ ਸੰਧੀ ਵਿੱਚ ਇੱਕ ਚੀਨੀ ਅਫਸਰ ਦੇ ਬਦਲੇ ਚੀਨ ਨੂੰ ਸਾਰੇ ਦੇ ਸਾਰੇ ਬੰਦੀ ਬਣਾਏ ਹੋਏ ਭਾਰਤੀ ਸਿਪਾਹੀਆਂ ਨੂੰ ਛੱਡਣ ਲਈ ਮਜਬੂਰ ਹੋਣਾ ਪਿਆ। ਇੱਥੇ ਇਹ ਵੀ ਬਹੁਤ ਅਫਸੋਸ ਨਾਲ ਲਿਖਣਾ ਪੈ ਰਿਹਾ ਹੈ ਕਿ ਜਿਸ ਮੁਲਕ ਦੀ ਰਾਖੀ ਕਰਦਿਆਂ ਸਿੱਖ ਫੌਜੀ ਸਰਹੱਦਾਂ ਤੇ ਹਿੱਕਾਂ ਡਾਹ ਕੇ ਲੜਦੇ ਮਰਦੇ ਹਨ,ਉਹ ਹੀ ਮੁਲਕ ਦਾ ਨਿਜਾਮ ਸਿੱਖਾਂ ਦੀ ਬਹਾਦਰੀ ਜਨਤਕ ਕਰਨ ਤੋ ਗੁਰੇਜ ਕਰਦਾ ਹੈ। ਇੱਥੇ ਹੈਰਾਨੀ ਇਸ ਗੱਲ ਤੋਂ ਹੂੰਦੀ ਹੈ ਕਿ ਜਿਸ ਘਟਨਾ ਨੂੰ ਪਰਚਾਰਨ ਦੀ ਲੋੜ ਸੀ,ਉਸ ਨੂੰ ਛੁਪਾਇਆ ਗਿਆ ਹੈ,ਇਸ ਤੋ ਵੱਡੀ ਅਕਿਰਤਘਣਤ ਅਤੇ ਅਹਿਸਾਨਫਰਾਮੋਸ਼ੀ ਹੋਰ ਕੀ ਹੋ ਸਕਦੀ ਹੈ।ਇਹ ਖਬਰ ਸ਼ੋਸ਼ਲ ਮੀਡੀਏ ਤੇ ਸਿਰਫ ਤੇ ਸਿਰਫ ਇੱਕਾ ਦੁਕਾ ਚੈਨਲਾਂ ਤੇ ਦਿਖਾਈ ਗਈ ਹੈ,ਜਦੋ ਕਿ ਬਾਕੀ ਸਾਰਾ ਭਾਰਤੀ ਮੀਡੀਆਂ ਅਤੇ ਸ਼ੋਸਲ ਮੀਡੀਆ ਇਸਤਰਾਂ ਚੁੱਪ ਹੈ,ਜਿਵੇ ਉਹਨਾਂ ਨੂੰ ਇਸ ਘਟਨਾ ਦਾ ਇਲਮ ਤੱਕ ਨਾ ਹੋਵੇ।ਜੇਕਰ ਕਿਸੇ ਸਿੱਖ ਫੌਜੀ ਤੋ ਕੋਈ ਜਾਣੇ ਅਣਜਾਣੇ ਵਿੱਚ ਗਲਤੀ ਹੋਈ ਹੁੰਦੀ ਤਾਂ ਹੁਣ ਤੱਕ ਭਾਰਤੀ ਮੀਡੀਏ ਨੇ ਪੂਰੀ ਦੁਨੀਆਂ ਨੂੰ ਬਾਤ ਦਾ ਬਤੰਗੜ ਬਣਾ ਕੇ ਦਿਖਾ ਦਿਖਾ ਸਿੱਖਾਂ ਨੂੰ ਬਦਨਾਮ ਕਰਨ ਵਿੱਚ ਕੋਈ ਕਸਰ ਨਹੀ ਸੀ ਛੱਡਣੀ,ਪਰ ਕਿਉਕਿ ਇਹ ਘਟਨਾ ਸਿੱਖਾਂ ਦੀ ਬਹਾਦਰੀ ਦਾ ਲੋਹਾ ਮਨਵਾਉਣ ਵਾਲੀ ਹੈ,ਸਿੱਖਾਂ ਦੇ ਮਾਣ ਸਤਿਕਾਰ ਨਾਲ ਜੁੜੀ ਹੋਈ ਹੈ,ਇਸ ਲਈ ਭਾਰਤੀ ਹਕੂਮਤ ਅਤੇ ਭਾਰਤੀ ਮੀਡੀਏ ਨੇ ਬੜੀ ਬੇਸ਼ਰਮੀ ਭਰੀ ਚਲਾਕੀ ਨਾਲ ਇਸ ਇਤਿਹਾਸਿਕ ਖਬਰ ਨੂੰ ਦੱਬ ਕੇ ਰੱਖਿਆ ਹੈ,ਜਦੋ ਕਿ ਚਾਹੀਦਾ ਇਹ ਸੀ ਕਿ ਇਸ ਖਬਰ ਨੂੰ ਵੱਧ ਤੋ ਵੱਧ ਪਰਚਾਰਿਆ ਜਾਂਦਾ ਅਤੇ ਉਹਨਾਂ ਬਹਾਦਰ ਸਿੱਖ ਸਿਪਾਹੀਆਂ ਨੂੰ ਦੁਨੀਆਂ ਸਾਹਮਣੇ ਕਰਕੇ ਦੱਸਿਆ ਜਾਂਦਾ ਕਿ ਕਿਵੇਂ ਉਹਨਾਂ ਸਿੱਖ ਜੁਆਨਾਂ ਨੇ ਇਸ ਵੱਡੇ ਇਤਿਹਾਸਿਕ ਕਾਰਨਾਮੇ ਨੂੰ ਅੰਜਾਮ ਦਿੱਤਾ,ਪਰ ਅਫਸੋਸ ! ਕਿ ਅਜਿਹਾ ਨਹੀ ਹੋਇਆ। ਭਾਰਤੀ ਹਕੂਮਤ ਜਿਸ ਜਮਾਤ ਦੀ ਅਗਵਾਈ ਕਰ ਰਹੀ ਹੈ,ਉਹ ਕਦੇ ਵੀ ਕਿਸੇ ਗੈਰ ਹਿੰਦੂ ਨੂੰ ਨਾਇਕ ਬਣਿਆ ਬਟਦਾਸਤ ਨਹੀ ਕਰ ਸਕਦੇ,ਭਾਂਵੇਂ ਕੋਈ ਵਿਅਕਤੀ ਭਾਰਤੀ ਸਟੇਟ ਦੀ ਬਹਾਦਰੀ ਨਾਲ ਰਾਖੀ ਕਰਦਿਆਂ ਹੀ ਨਾਇਕ ਕਿਉਂ ਨਾ ਬਣਿਆ ਹੋਵੇ।ਸਿੱਖ ਕੌਂਮ ਨੂੰ ਇਹ ਗੁਰੂ ਦੀ ਬਖਸ਼ਿਸ਼ ਹੈ ਕਿ ਉਹ ਜਦੋ ਕਿਸੇ ਵੀ ਕੰਮ ਲਈ ਜਾਂ ਮੁਹਿੰਮ ਲਈ ਅਪਣੇ ਗੁਰੂ ਨੂੰ ਹਾਜਰ ਨਾਜਰ ਜਾਣ ਕੇ ਅਰੰਭ ਕਰਦੇ ਹਨ,ਤਾਂ ਜਿੱਤ ਉਹਨਾਂ ਦੇ ਕਦਮਾਂ ਨੂੰ ਮੱਲੋ ਮੱਲੀ ਚੁੰਮ ਲੈਦੀ ਹੈ। ਇੱਥੇ ਵੀ ਭਾਰਤੀ ਫੌਜ ਦੇ ਇਹਨਾਂ ਸਿੱਖ ਸਿਪਾਹੀਆਂ ਨੇ ਅਪਣੇ ਗੁਰੂ ਸਾਹਿਬ ਦੇ “ਸਵਾ ਲਾਖ ਸੇ ਏਕ ਲੜਾਊ”ਵਾਲੇ ਸਿਧਾਂਤ ਤੇ ਪਹਿਰਾ ਦੇ ਕੇ ਅਪਣੇ ਪੁਰਖਿਆਂ ਬਾਬਾ ਬੋਤਾ ਸਿੰਘ ਅਤੇ ਬਾਬਾ ਗਰਜਾ ਸਿੰਘ ਦੇ ਸੁਨਿਹਰੀ ਇਤਿਹਾਸ ਨੂੰ ਦੁਹਰਾਉਣ ਵਾਲਾ ਕਾਰਜ ਕੀਤਾ ਹੈ।ਭਾਂਵੇ ਭਾਰਤੀ ਸਟੇਟ ਅਤੇ ਭਾਰਤੀ ਮੀਡੀਆ ਨੇ ਸਿੱਖਾਂ ਦੀ ਬੀਰਤਾ ਨੂੰ ਛੁਪਾਉਣ ਦਾ ਕੋਝਾ ਯਤਨ ਕੀਤਾ ਹੈ,ਪਰ ਸਿੱਖਾਂ ਨੇ ਇੱਕ ਵਾਰ ਫਿਰ ਦੁਨੀਆਂ ਨੂੰ ਇੱਕ ਤਾਂ ਇਹ ਸੁਨੇਹਾ ਦੇਣ ਵਿੱਚ ਸਫਲਤਾ ਹਾਸਿਲ ਕੀਤੀ ਹੈ ਕਿ ਅਪਣੇ ਆਪ ਨੂੰ ਮਹਾਂ ਸ਼ਕਤੀ ਸਮਝਣ ਵਾਲੇ ਵੀ ਸਿੱਖ ਕੌਂਮ ਅੱਗੇ ਬੇਬੱਸ ਹੋ ਜਾਂਦੇ ਹਨ।ਦੂਜਾ ਇਹ ਕਿ ਸਰਬੱਤ ਦਾ ਭਲਾ ਚਾਹੁਣ ਵਾਲੀ ਸਿੱਖ ਕੌਂਮ ਅੱਜ ਵੀ ਲੋੜ ਪੈਣ ਤੇ ਅਪਣੇ ਪੁਰਖਿਆਂ ਦਾ ਇਤਿਹਾਸ ਦੁਹਰਾ ਸਕਦੀ ਹੈ,ਕਿਉਕਿ ਉਹਨਾਂ ਦਾ ਗੁਰੂ ਹਰ ਸ਼ੁਭ ਕਾਰਜ ਦੇ ਮੌਕੇ ਉਹਨਾਂ ਦੇ ਅੰਗ ਸੰਗ ਹੁੰਦਾ ਹੈ।
25
Jun
ਅਮਰੀਕੀਆਂ ਨੂੰ ਨੌਕਰੀ ਦੇਣ ਲਈ ਜ਼ਰੂਰੀ ਸੀ ਗਰੀਨ ਕਾਰਡ 'ਤੇ ਰੋਕ: ਟਰੰਪ
ਨਿਊ ਯਾਰਕ (ਦੇਸ਼ ਵਿਦੇਸ਼ ਬਿਊਰੋ) ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸਾਲ ਦੇ ਅੰਤ ਤਕ ਗ੍ਰੀਨ ਕਾਰਡ ਜਾਰੀ ਕਰਨ ਦੀ ਪ੍ਰਕਿਰਿਆ 'ਤੇ ਰੋਕ ਲਾਉਣ ਦੇ ਆਪਣੇ ਫ਼ੈਸਲੇ ਦਾ ਬਚਾਅ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਅਮਰੀਕੀਆਂ ਨੂੰ ਨੌਕਰੀ ਦੇਣ ਲਈ ਅਜਿਹਾ ਕਰਨਾ ਜ਼ਰੂਰੀ ਸੀ। ਦੱਸ ਦਈਏ ਕਿ ਟਰੰਪ ਨੇ ਅਪ੍ਰੈਲ ਵਿਚ ਇਕ ਆਦੇਸ਼ ਰਾਹੀਂ ਗ੍ਰੀਨ ਕਾਰਡ ਜਾਰੀ ਕਰਨ 'ਤੇ ੯੦ ਦਿਨਾਂ ਦੀ ਰੋਕ ਲਗਾ ਦਿੱਤੀ। ਸੋਮਵਾਰ ਨੂੰ ਇਸ ਸਬੰਧ ਵਿਚ ਇਕ ਨੋਟੀਫਿਕੇਸ਼ਨ ਜਾਰੀ ਕਰਦੇ ਹੋਏ ਇਸ ਮੁਅੱਤਲੀ ਦੀ ਮਿਆਦ ੩੧ ਦਸੰਬਰ ੨੦੨੦ ਤਕ ਵਧਾ ਦਿੱਤੀ ਗਈ। ਟਰੰਪ ਤੋਂ ਜਦੋਂ ਗ੍ਰੀਨ ਕਾਰਡ ਮੁਅੱਤਲੀ ਦੇ ਆਦੇਸ਼ ਬਾਰੇ ਪੁੱਛਿਆ ਗਿਆ ਤਾਂ ਉਨ੍ਹਾਂ ਨੇ ਮੰਗਲਵਾਰ ਨੂੰ ਸੈਨ ਲੂਈਸ, ਐਰੀਜੋਨਾ ਵਿਚ ਪੱਤਰਕਾਰਾਂ ਨੂੰ ਕਿਹਾ, ਫ਼ਿਲਹਾਲ ਸਾਡਾ ਧਿਆਨ ਅਮਰੀਕੀਆਂ ਨੂੰ ਨੌਕਰੀ ਦੇਣ 'ਤੇ ਹੈ। ਹਾਲੇ ਅਸੀਂ ਚਾਹੁੰਦੇ ਹਾਂ ਕਿ ਨੌਕਰੀਆਂ ਅਮਰੀਕੀਆਂ ਨੂੰ ਮਿਲਣ। ਤਿੰਨ ਨਵੰਬਰ ਨੂੰ ਹੋਣ ਵਾਲੀਆਂ ਰਾਸ਼ਟਰਪਤੀ ਚੋਣਾਂ ਵਿਚ ਦੁਬਾਰਾ ਕਿਸਮਤ ਅਜ਼ਮਾ ਰਹੇ ਰਾਸ਼ਟਰਪਤੀ ਟਰੰਪ ਨੇ ਸੋਮਵਾਰ ਨੂੰ ਕਿਹਾ ਸੀ ਕਿ ਕੋਰੋਨਾ ਮਹਾਮਾਰੀ ਵਿਚਾਲੇ ਆਰਥਿਕ ਸੰਕਟ ਦੇ ਕਾਰਨ ਨੌਕਰੀਆਂ ਗਵਾਉਣ ਵਾਲੇ ਲੱਖਾਂ ਅਮਰੀਕੀਆਂ ਦੀ ਮਦਦ ਕਰਨ ਲਈ ਇਹ ਕਦਮ ਲਾਜ਼ਮੀ ਸੀ। ਟਰੰਪ ਨੇ ਕਿਹਾ ਕਿ ਦੇਸ਼ ਵਿਚ ਕੁੱਲ ਬੇਰੁਜ਼ਗਾਰੀ ਦਰ ਫਰਵਰੀ ਅਤੇ ਮਈ ੨੦੨੦ ਵਿਚ ਲਗਪਗ ਚਾਰ ਗੁਣਾ ਹੋ ਗਈ। ਅਮਰੀਕਾ ਹਰ ਸਾਲ ੧ ਲੱਖ ੪੦ ਹਜ਼ਾਰ ਗਰੀਨ ਕਾਰਡ ਜਾਰੀ ਕਰਦਾ ਹੈ। ਹਾਲੇ ਅਮਰੀਕਾ ਵਿਚ ਕਾਨੂੰਨੀ ਰੂਪ ਨਾਲ ਰਹਿ ਰਹੇ ਲਗਪਗ ੧੦ ਲੱਖ ਵਿਦੇਸ਼ੀ ਨਾਗਰਿਕਾਂ ਅਤੇ ਉਨ੍ਹਾਂ ਦੇ ਪਰਿਵਾਰ ਦੇ ਮੈਂਬਰਾਂ ਦੀ ਵੀਜ਼ਾ ਪ੍ਰਕਿਰਿਆ ਅਟਕੀ ਹੋਈ ਹੈ। ਇਨ੍ਹਾਂ ਅਰਜ਼ੀਆਂ ਨੂੰ ਮਨਜ਼ੂਰੀ ਦੇ ਦਿੱਤੀ ਗਈ ਹੈ ਪਰ ਹਾਲੇ ਤਕ ਇਨ੍ਹਾਂ ਨੂੰ ਰੁਜ਼ਗਾਰ ਵਾਲਾ ਗ੍ਰੀਨ ਕਾਰਡ ਨਹੀਂ ਮਿਲਿਆ ਹੈ। ਅਮਰੀਕੀ ਸੰਸਦ ਮੈਂਬਰਾਂ ਨੇ ਐੱਚ੧ਬੀ ਵੀਜ਼ਾ ਸਮੇਤ ਦੂਜੇ ਰੁਜ਼ਗਾਰ ਅਧਾਰਿਤ ਵੀਜ਼ਾ ਪ੍ਰੋਗਰਾਮਾਂ 'ਤੇ ਰੋਕ ਲਾਉਣ ਦੀ ਨਿੰਦਾ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਨਾ ਸਿਰਫ਼ ਏਸ਼ੀਆ ਦੇ ਕੁਸ਼ਲ ਕਾਮੇ ਪ੍ਰਭਾਵਿਤ ਹੋਣਗੇ ਬਲਕਿ ਇੰਮੀਗ੍ਰੈਂਟ ਕਾਮਿਆਂ ਦੇ ਭਰੋਸੇ ਚੱਲਣ ਵਾਲੇ ਅਮਰੀਕੀ ਕਾਰੋਬਾਰਾਂ ਨੂੰ ਭਾਰੀ ਨੁਕਸਾਨ ਝੱਲਣਾ ਹੋਵੇਗਾ। ਸੰਸਦ ਦੀ ਏਸ਼ੀਅਨ-ਪੈਸੇਫਿਕ ਅਮਰੀਕਨ ਕੌਕਸ ਦੀ ਪ੍ਰਧਾਨ ਜੂਡੀ ਚੂ ਨੇ ਕਿਹਾ ਕਿ ਰਾਸ਼ਟਰਪਤੀ ਵੱਲੋਂ ਚੁੱਕਿਆ ਗਿਆ ਪੱਖਪਾਤੀ ਕਦਮ ਰਾਸ਼ਟਰੀ ਹਿੱਤਾਂ ਦੇ ਖ਼ਿਲਾਫ਼ ਹੈ। ਜੇਕਰ ਅਸੀਂ ਅਰਥ-ਵਿਵਸਥਾ ਨੂੰ ਫਿਰ ਤੋਂ ਖੜ੍ਹਾ ਕਰਨਾ ਚਾਹੁੰਦੇ ਹਾਂ ਤਾਂ ਅਸੀਂ ਖੁਦ ਨੂੰ ਇੰਮੀਗ੍ਰੈਂਟਾਂ ਤੋਂ ਦੂਰ ਨਹੀਂ ਕਰ ਸਕਦੇ ਹਾਂ। ਰਾਸ਼ਟਰਪਤੀ ਵੱਲੋਂ ਚੁੱਕਿਆ ਗਿਆ ਇਹ ਕਦਮ ਚੋਣਾਂ ਨੂੰ ਦੇਖਦੇ ਹੋਏ ਲਿਆ ਗਿਆ ਹੈ। ਉੱਧਰ, ਹਾਊਸ ਜਿਊਡਿਸ਼ਰੀ ਕਮੇਟੀ ਦੇ ਪ੍ਰਧਾਨ ਜੈਰੀ ਨਾਡਲਰ ਨੇ ਕਿਹਾ ਕਿ ਵੀਜ਼ਾ ਮੁਅੱਤਲੀ ਆਦੇਸ਼ ਨਾ ਸਿਰਫ਼ ਰਾਸ਼ਟਰਪਤੀ ਦੀ ਕਾਰਜਕਾਰੀ ਸ਼ਕਤੀ ਦੀ ਦੁਰਵਰਤੋਂ ਹੈ ਬਲਕਿ ਇਹ ਸਿਆਸਤ ਤੋਂ ਵੀ ਪ੍ਰੇਰਿਤ ਹੈ।
Canada Edition